კინტრიშის დაცული ლანდშაფტი

Tel:+995 598 760 860

კინტრიშის დაცული ტერიტორია მდებარეობს აჭარის ავტონომიურ რესპუბლიკაში, (ქობულეთის რაიონი), მისი საერთო ფართობი შეადგენს 13.893 ჰა. იგი მოქცეულია მდინარე კინტრიშის თვალწარმტაც ხეობაში, სოფელ ცხემვანსა და ხინოს მთებს შორის, ზღვის დონიდან 300-2500 მეტრ სიმაღლეზე. დაცულ ტერიტორიებს ესაზღვრება, ჩრდილოეთით ქობულეთის სატყეოს ადმინისტრაციის ტერიტორიები, სამხრეთ- აღმოსავლეთით შუახევის მუნიციპალიტეტის ტერიტორია, სამხრეთით ქედის მუნიციპალიტეტის ტერიტორია, სამხრეთ- დასავლეთით მტირალას ეროვნული პარკი. კინტრიშის დაცული ტერიტორიების ადმინისტრაცია მართავს ორ სხვადასხვა კატეგორიის დაცულ ტერიტორიას - სახელმწიფო ნაკრძალი და დაცული ლანდშაფტი. კინტრიშის სახელმწიფო ნაკრძალი დაარსდა 1959 წელს,  დაარსების მიზანი იყო შუამთის რელიქტური ტყეების და ენდემური სახეობების, ფლორისა და ფაუნის დაცვია. 

2007 წელს კინტრიშის სახელმწიფო ნაკრძალის  ბაზაზე შეიქმნა    დაცული ლანდშაფტი: სახელმწიფო ნაკრძალის ფართობია 10.703 ჰა, ხოლო დაცული ლანდშაფტი 3.190 ჰა. კინტრიშის დაცულ ტერიტორიებში ვიზიტორებს ვთავაზობთ ორ ტურისტულ მარშუტზე გადაადგილებას, როგორც ფეხით ასევე ცხენით. ტურისტული მარშუტები მდებარეობს ზღვის დონიდან 300-2000 მეტრ სიმაღლეზე. ბილიკების გასწვრივ მოწყობილია საპიკნიკე და საკემპინგე ადგილები, ასევე გამოყოფილია ადგილი ცეცხლის დასანთებად.  ვიზიტორებს დაცული ტერიტორიის მონახულება შეუძლიათ წელიწადის ნებისმიერ დროს. გიდის, ცხენის და ადგილობრივი ტრანსპორტის ორგანიზებაში დაგეხმარებათ დაცული ტერიტორიების ვიზიტორტა ცენტრი.