ბორჯომ-ხარაგაულის ეროვნული პარკი
Tel:+995 598 760 860

ბორჯომ-ხარაგაულის ეროვნული პარკი  ცენტრალურ საქართველოში, მცირე კავკასიონის რეგიონში, თბილისიდან სამხრეთ-დასავლეთში მდებარეობს.ერთ-ერთი უდიდესი ეროვნული პარკი ევროპაში, მდებარეობს სამცხე-ჯავახეთის, იმერეთისა და შიდა ქართლის მხარეების ტერიტორიაზე.

პარკი დაარსდა 1995 წელს და მისი მთლიანი ფართობია 85 083 ათასი ჰექტარი, რომელიც წარმოდგენილია კარგად შენახული და დაცული ტყის ჰაბიტატებით, იშვიათი და განუმეორებელი ფლორითა და ფაუნით, თვითმყოფადი და განუმეორებელი ლანდშაფტებით. ტურისტულ და მეცნიერულ ინტერესს იწვევს გეოგრაფიული და ეკოლოგიური ზონების მრავალფეროვნება, მდიდარი ცხოველთა სამყარო და მრავალფეროვანი მცენარეული საფარი. დაცულ ტერიტორიაზე მდებარე ისტორიული ძეგლები პარკს ქართული კულტურით დაინტერესებულთათვისაც მიმზიდველს ხდის.

ამჟმად პარკის ტერიტორიაზე 9 ოფიციალური ტურისტული ბილიკი ფუნქციონირებს. ბილიკების გასწვრივ განლაგებულია ტურისტული თავშესაფრები, რომლებიც ელემენტარულადაა აღჭურვილი. უბრალოდ საჭიროა თან იქონიოთ საძილე ტომრები. თავშესაფარში არაა საჭმლის მოსამზადებელი საშუალება. მხოლოდ ცეცხლის დანთების შესაძლებლობაა.

ბილიკების ახლოს და პარკის შესასვლელბში მოთავსებულია მცველთა თავშესაფრები და საგუშაგოები, რომელთა გამოყენებაც ღამისთევისათვის შესაძლებელია საჭიროების შემთხვევაში.
პარკის შესასვლელბში მოწყობილია საპიკნიკე და კარვების გასაშლელი ადგილები, ადგილები ცეცხლის დასანთებად და მანქანების გასაჩერებლად.
ჩვენ გირჩევთ თქვენი ლაშქრობის პერიოდში გამოიყენოთ ეროვნული პარკის გიდების მომსახურება.

საოცარი პეიზაჟები ელით ფოტოგრაფებს სექტემბერ-ოქტომბერში, როდესაც ხედები იცვლება შავი ზღვიდან დიდ კავკასიონამდე და როდესაც ყოველი ფოთოლი ყვავილია.